May aksiyalarında tutulanların sayı daha artıqımış
İranın müxtəlif rayonlarında fars şovinizminə qarşı may ayında keçirilən aksiyalarda tutulanların sayı yayılan statistikalardan daha artıqdır. “Urmunyus” agentliyindən verilən xəbərə görə, intizami qüvvələrin təcridxanalarında və həbsxanalarında əsgərlik xidmətində olanların bir neçəsi bu barədə bildirib. Onların dediyinə görə, təkcə Təbrizin «Ettelaat» və intizami zindanlarında mayın 22-də tutulub həbsə salınanların sayı 800 nəfərdən artıq imiş. İntizami mənsubları tutulanların ailəsini hədələyibmiş ki, bu barədə heç bir agentliyə xəbər verməsinlər. Məsələn, Təbriz Universitetinin hüquq fakultəsində tələbə Qəfur Həbibpur və Roşənnejad gizlı vərəq payladığı zaman tutulub, 20 gündən sonra vəsiqə zamini ilə azadlığa buraxılıb. Q.Həbibpurun dediyinə görə, «Ettelaat» onun ailəsini hədələyib ki, bu barədə heç kəsə heç bir məlumat verməsinlər.
