Daniel Frid: «Biz Rusiyanın Avropada raket hucumundan müdafiə kompleksi quraşdırmaq ideyamıza münasibətindən narazıyıq»
“ABŞ Polşa və Çexiyada raket hücumundan müdafiə kompleksi quraşdırmaq niyyətindən imtina etməsə də, Vladimir Putinin Azərbaycandakı stansiyadan birgə istifadə ilə bağlı təklifi müəyyən qədər dəyərlidir”.
APA-nın məlumatına görə, bu fikirləri AB, dövlət katibinin müavini Daniel Frid söyləyib. O, Putinin təklifini maraqlı adlandırıb: “Rusiya bu təklifi etməklə İrandan təhlükə mövcud olması ehtimalımızı təsdiqləyir. Bununla belə biz Rusiyanın Avropada raket hücumundan müdafiə kompleksi quraşdırmaq ideyamıza münasibətindən narahat və narazıyıq. Hazırda ABŞ-Rusiya münasibətləri çox çətin mərhələni keçir”. Qeyd edək ki, ABŞ Çexiya ərazisində radiolokasiya stansiyası, Polşada isə raket hücumundan müdafiə kompleksi quraşdırmaq istəyir. Buş administrasiyası bu addımların İran və Şimali Koreyadan gözlənilən raket zərbələrinin qarşısını almaq üçün atıldığını bildirir.
