Ayətullah Brucerdi edama məhkum edildi
«Əmir Kəbir» agentliyinin verdiyi məlumata görə, ayətullah Kazemeyni Burucerdi və onun 80 nəfər yoldaşı iyunun 10-da Tehranın Zəfəraniyyə xiyabanında yerləşən “Ruhaniyyət” məhkəməsinin 3-cü şöbəsində gizlicə mühakimə olunub. Ayətullah Burucerdiyə edam, 17 nəfər onun yoldaşına isə müxtəlif cəzalar verilib. Qalanların məhkəməsi yarımçıq qalıb. Ayətullah Burucerdinin yaxınlarının dediyinə görə, ona 30-dan artıq ittiham irəli sürülüb. O cümlədən, milli təhlükəsizliyi pozmaq, xalqı rejimin əleyhinə yönəltmək məqsədilə təbliğat aparmaq, “Vilayəti-fəqih»i qeyri-rəsmi orqan saymaq, İranın dini rəhbərini yalançı və din təhrifçisi adlandırmaq, xarici antiinqilablarla əməkdaşlıq və onlara casusluq etmək, “Sünnəti-din” adlı yeni din yaratmaq və s.
Canlı şahidlərin dediyinə görə, bu ittihamlara qarşı ayətullah Burucerdi hakimə bunları deyib: ”1995-ci və 2000-ci ildə də fəaliyyətlərimə görə dəfələrlə həbsə atılmışam. Mən yeni din yaratmamışam. Şəriətmədari kimi, mən də dinin siyasətdən ayrılmasını istəyirəm. Əgər məhkəmə ədalətlidirsə, mənə icazə versin, vəkil tutub, açıq şəkildə özümü müdafiə edim”.
