Xarici İşlər Nazirliyi ABŞ-ı hədələdi
İranın xarici işlər naziri Mənuçehr Mottəki ABŞ hakimiyyətini hədələyərək deyib: ”Biz ABŞ-ı peşman edəcəyik”. “Fars” agentliyindən verilən xəbərə görə, M.Mottəki Afrika Birliyi Komissiyasının sədri ilə müştərək mətbuat konfransında verdiyi bəyanatda bildirib ki, İran Xarici İşlər Nazirliyi çox geniş şəkildə ABŞ-un bu qeyri-qanuni işlərinə qarşı əməliyyatlar həyata keçirir və «Amerikanı kor-peşman edəcəklər». M.Mottəki əlavə edib ki, tezliklə BMT-yə yenə də şikayət ərizəsi yazılacaq: «Bizim mütəmadi məktublarımıza önəm verməyən Ban Ki Muna bildirəcəyik ki, Birləşmiş Millətlər Təşkilatı heç nəyə yaramır».
Xatırladaq ki, yanvarın 11-də ABŞ-ın İraqdakı qüvvələri bu ölkənin şimalında yerləşən Kürdüstan əyalətinin Ərbil şəhərində İran konsulluğuna hücum edərək beş nəfəri tutub. İran hökuməti tutulan şəxslərin diplomat olduğunu iddia etsə də, ABŞ-ın İraqdakı hərbi komandanlığı onların İran İnqilab Keşikçiləri Korpusunun («Sepah») Qüds qanadının üzvü olduqlarını bildirir.
