ABŞ Dövlət Departamenti İrana qarşı sanksiyaların sərtləşəcəyini bəyan edir
ABŞ Dövlət Departamenti uranı zənginləşdirməyi dayandırmaq barədə BMT-nin çıxardığı üç qətnaməyə məhəl qoymadığı üçün İrana qarşı hazırkı sanksiyaları daha da sərtləşdirəcəyini bəyan edib.
Dövlət Departamentinin sözçüsü Şon Makkormak jurnalistlərə bildirib ki, BMT Təhlükəsizlik Şurasına üzv ölkələr və Almaniya hələlik bu haqda konkret təklif irəli sürməsələr də, ABŞ-ın özü İrana qarşı beynəlxalq sanksiya və tədbirləri sürətləndirmək istəyir: «BMT-nin İrana qarşı növbəti addımı barədə mən hələlik nəsə deyə bilmərəm. Təkcə onu bilirəm ki, yaxın həftələrdə Nyu-Yorkda və «1+5» qrupuna üzv ölkələrin paytaxtlarında İrana qarşı atılacaq növbəti addımla bağlı daha sıx və ciddi danışıqların şahidi olacağıq».
Ş.Makkormak İranın bank sisteminə qarşı maliyyə təzyiqlərinin gücləndiriləcəyini də istisna etməyib: «Biz öz dost və müttəfiqlərimizlə BMT Təhlükəsizlik Şurası çərçivəsində İrana qarşı maliyyə təzyiqlərini genişləndirmək barədə müzakirələr aparırıq. Bu isə dünya ictimaiyyətinin İranın nüvə fəaliyyətindən narahat olduğu barədə İrana ünvanlanmış bir mesajdır».
