Abbas Lisani məhkəməyə müraciət edib
İran azərbaycanlılarının hüquqları uğrunda hərəkatın liderlərindən biri Abbas Lisani məhkəməyə müraciət edib. A. Lisaninin həyat yoldaşı Ruqəyya Lisani İrandan APA-ya açıqlamasında deyib ki, müraciətdə A. Lisani azadlığa çıxmaq istəmədiyini və cəza müddətini sona qədər çəkməkdə israrlı olduğunu bildirib. Bunun səbəbini isə A. Lisani cəza müddətinin bitməsinə çox qalmaması ilə izah edib. R. Lisani mayın 16-da Abbas Lisaninin işinə baxan Təbriz Şəhər Məhkəməsinin qərarının hələ də açıqlanmadığını diqqətə çatdırıb: “Məhkəmənin keçirildiyi gündən 20 gün keçməsinə baxmayaraq, qərar açıqlanmayıb və bu da bizi narahat edir. Vəziyyətlə bağlı bütün nüfuzlu beynəlxalq təşkilatlara müraciət edilib”. Qeyd edək ki, A. Lisani 2006-cı ilin may-iyun hadisələrindən sonra aksiyaların təşkil olunmasında təqsirli bilinərək saxlanılıb və məhkəmənin qərarı ilə 1 il 6 ay müddətinə azadlıqdan məhrum edilib. Mayın 15-də Təbriz Şəhər Məhkəməsində keçirilən prosesdə isə A. Lisani 2006-cı ildə Bəzz qalasına yürüşün təşkilində ittiham olunub.
