Fars rejimi “Bəzz” qalasina yürüşün qarşisini almaq istəyir
Azərbaycanın güneyində vəziyyət ağır olaraq qalmaqdadır. İran rejimi milli hərəkatçılara, onların yaxınlarına, ümumiyyətlə, aksiyalarda iştirak etmiş bütün şəxslərə qarşı amansızcasına mübarizə aparır. Güneydən gələn xəbərlərə görə, fars rejimi Babək qalasına yürüşün qarşısını almaqdan ötrü repressiya tədbirlərini bütün Güney Azərbaycan ərazisində həyata keçirir.
Rejim milli hərəkatın Kəleybər şəhəri yaxınlığında yerləşən Bəzz qalasına nəzərdə tutduğu yürüşün möhtəşəmliyinə xələl gətirməkdən ötrü fəalları saxta ittihamlarla zindana atır. İyunun 3-də Qoşaçayda ETTELAAT əməkdaşları milli fəal Mehdi Təgərgini evindən çıxararaq naməlum istiqamətə aparıblar. Qoşaçay Azad Universitetinin məzunu olan Təgərginin harda saxlandığı barədə hələlik heç bir məlumat yoxdur. Bu il mayın 22-də keçirilən etiraz aksiyalarında iştirak etdikləri üçün Qoşaçay həbsxanasına salınan milli fəallardan 14-ü Urmiya zindanına köçürülüb. Ağır böyrək xəstəliyindən əziyyət çəkən Behbud Quluzadənin də həmin məhbuslar arasında olduğu bildirilir. Məlumatda həmçinin tanınmış milli fəal Əsğər Əsədinin (Eldəniz) Təbriz həbsxanasında saxlandığı və onun ailəsinin yalnız on gün sonra bunu öyrənə bildiyi vurğulanır.
Son günlərdə bir sıra hərəkat fəalları külli miqdarda girov qoymağın müqabilində sərbəst buraxılıblar.
